БИШКЕК, 30-мар. — Sputnik. Кадамжай шаарына кире бериште жол кырсыгынан жабыркаган аскерлердин дагы төртөөнө операция жасалат. Бул тууралуу өкмөттүн Баткен облусундагы ыйгарым укуктуу өкүлү Абиш Халмурзаев аскерлердин абалы менен таанышуу үчүн барган учурда белгилүү болгонун өкүлчүлүктүн маалымат кызматы билдирди.
Белгилей кетсек, 27-мартта аскердик унаа жол кырсыгына кабылып, жол четиндеги турак үйдүн короосуна кирип кеткен. Кырсыктан жаракат алган 29 аскер ооруканага жеткирилген. Жети жоокер оор абалда, бир аскерге операция жасалды.
"Башкы дарыгердин айтымында, жакынкы күндө дагы төрт аскерге операция жасалмакчы. Жеңил жаракат алган 14 жоокер Ош шаарындагы аскердик госпиталга которулган. 29-мартта алты жоокер Ошко жөнөтүлдү", — деп айтылат маалыматта.
Халмурзаев ошондой эле жабыр таркан үйдүн ээлери менен жолугуп, окуя толук териштирилгенден кийин компенсация маселесин чечип берүүнү убадалады. Андан сырткары, жергиликтүү бийликке тез арада турак үйдүн жол жактагы тарабын тосуу иштерин бүткөрүүнү тапшырды.
"Кыргызжолтрансдолбоор" ишканасы аталган жолдун жээгине бетон тосмо куруу, ошондой эле ылдамдыкты азайта турчу атайын түзүлүштөр жана авариялык учурда атайын токтой турчу жердин чиймесин даярдаган.
Андан сырткары, 121-чакырымга жүк ташуучу автоунаалар үчүн кошумча 800 метр айланма жол салынган. Ал жакта Кайгуул милициясы автоунаалардын кыймылын көзөмөлдөп турат. Ошондой эле 123-чакырымга үч светофор орнотуу үчүн 500 миң сом бөлүнгөн.
