Жамгыр жана кар. Бүгүн, 27-мартта, өлкө аймагында жаан жаап, бийик тоолуу жерлерге кар түшөрүн Кыргызгидромет билдирди. Ал эми Бишкекте 13 градус жылуу болуп, жамгыр жаайт.
Жапаров жаатында. Акыркы эки күн өлкөнүн саясий айдыңына кайрадан боёк сүрткөндөй болду. Сыртта жүргөн мурдагы депутат Садыр Жапаровдун Кыргызстанга келиши аны кармоо жана митинг, ызы-чуу менен коштолду. Ал эми сот алардын бир катарлардын 2-5 күнгө темир тордун артына отургузса, бир нече беренелер менен айып тагылган Жапаровду бир ай мөөнөткө, тергөө бүтмөйүн СИЗОго киргизди.
Жанар Акаев жана депутаттык. Саясатты улай кеп кылсак, анда жакында эле КСДП фракциясынан чыгарылган жаш депутат Жанар Акаевдин ишмердүүлүгүнө баам салдык.
Оштон келген жагымсыз кабар. Саясат өзүнчө кайнап жатканда кечээ эртең менен Оштон жагымсыз кабар алдык. 26-мартта таңга жуук Ош облусунун Өзгөн районундагы Ничке-Сай айылынын Топ-Жаңгак участкасында жер көчүп, бир турак жайды басып, төрт балалуу үй-бүлө көчкү алдында калыптыр…
Илим бутуна туруп кетти. Мындан 26 күн мурда автокырсыкка кабылып, операция жасалган Коомдук биринчи каналдын жетекчиси Илим Карыпбеков ооруканадан үйүнө чыкты. Ылайым жакшы болуп кетисин демекчибиз.
Нооруз жана жаш эне. Кыргызстандын президенти Алмазбек Атамбаевдин Ноорузга таасирленген кызы Алия Шагиева жаңы төрөгөн ымыркайынын сүрөтүн социалдык тармакка жарыялап, ошол жерге эле бабасы Ноорузбай тууралуу пикирин жазды.
Чет өлкөдө адам өмүрүн сактап калган Каныбек. Россиянын Иркутск шаарында эмгектенип жүргөн кыргызстандык мигрант Каныбек Абдулазизов бешинчи кабаттын терезесине асылып калган карыянын өмүрүн сактап калды. Окуя болгон күнү ал ошол үйдүн короосун шыпырып жүргөн.
Валюта наркы. Бүгүн сомдун баасы долларга карата орто эсеп менен 68.72 (сатып алуу), 69.06 (сатуу) сомду түзөт.
Мунай баасы. Аи-92 үлгүсүндөгү май 38.00 сом, Аи-95 үлгүсүндөгү бензин 40.70 сом, ал эми дизель майы 35.50 сомдон сатылууда.
Соңку сөз ордуна. Жакшыга айтсаң билет, жаманга айтсаң күлөт
Иш жумабыз ийгиликтүү болушун каалап, Нургүл Максутова
