БИШКЕК, 25-мар. — Sputnik. УКМК Садыр Жапаровду камакка алды. Бул тууралуу аталган мекемеден билдиришти.
Экс-депутат Кылмыш жаза кодексинин 227,341, 113 жана 234-беренелери (Барымтага алуу, бийлик өкүлүнө карата зомбулук көрсөтүү, өлтүрөм деп коркутуу, бейбаштык) боюнча күнөөлөнүүдө.
"Тергөө учурунда 2013-жылдын 7-октябрындагы Каракол шаарында болгон нааразычылык акциясы учурунда Эмил Каптагаевди барымтага алгандарга телефон аркылуу буйрутма берип турганы аныкталган", — деп жазылат маалыматта.
Барымтага алынган Каптагаев отурган унаа Жапаровдун тууганы Куланбаевге таандык болуп, ал Казакстандан кармалган. Учурда аны Кыргызстанга кайтаруу боюнча аракеттер көрүлүүдө.
Мындан сырткары, Жапаров аталган митингди каржылаган деп айыпталууда.
Учурда ал УКМКнын убактылуу кармоочу жайына киргизилди.
