Нооруз майрамы Кыргызстандын булуң-бурчунда өзгөчө шаң менен белгиленди. Бишкек шаарында майрамдын көркүн көк бөрү ачса, аймактарда театрлаштырылып коюлган оюн-зоок келгендердин көңүлүн көтөрдү.
Бука моюн буура сан улакчылар. Бишкектеги "Ак-кула" ат майданында өткөн көк бөрүнүн финалдык кармашы абдан кызыктуу өттү. Баш байге үчүн кыл чайнаша кармашкан Оштун "Достук" командасы менен Таластын "Ынтымак" командасы көрөрмандарга кызыктуу оюн тартуулашты. "Достук" биринчи таймда алдыга чыкканы менен байгени экинчи бөлүктө колдон чыгарып жиберди. "Көк бөрү көрөбүз" деп келгендердин сүрөөнү бир тең, улакчылардын шамдагайлыгы бир тең болду.
Жаз гүлүндөй ачылган "Ала-Тоо" аянтында шаардыктардын көңүлүн көтөрүү үчүн өзгөчө концерттик номерлер менен театрлаштырылган оюн-зоок коюлду. Өкмөт башчы Сооронбай Жээнбеков баштаган аткаминерлер чогулган элди Жаңы жылы менен куттукташты.
Чет жактагы мекендештер кантип майрамдашты. Асманда жылдыз, анан жерде кыргыз көп дегендей эле кыргыздардын буту баспаган бир дагы мамлекет калган жок окшойт. Нооруз майрамын дүйнөнүн чар тарабындагы кыргыздар дагы белгилешти. Англиядан Сахалинге чейин майрам кандай белгиленгенин окуп, чер жазыңыз.
Майрамдын даамы сүмөлөк. Нооруздун көркүн сүмөлөк ачат. Канча кылымдардын бери сакталып, жасалып келе жаткан бул тамакты кантип жасоо керектигин бардыгы эле биле бербесе керек. Кийинки жылы сөзсүз сүмөлөк жасайм деп жаткан болсоңуз бул тамакты баштан аяк кантип жасоо керектигин бул жактан караңыз.
Ал эми Нооруздун келип чыгышы тууралуу кызыгып жатсаңыз Абдыкерим Муратовдун жазгандары сизге жардамчы болот.
Валюта наркы. Бүгүн сомдун баасы долларга карата орто эсеп менен 69.02 (сатып алуу), 69.31 (сатуу) сомду түзөт.
Мунай баасы. Аи-92 үлгүсүндөгү май 38.00 сом, Аи-95 үлгүсүндөгү бензин 40.50 сом, ал эми дизель майы 35.30 сомдон сатылууда.
Сөз соңунда. Теребел тынч уйкудан ойгонуп, кышы бою уйкуда жаткан жаратылыш дагы жанданды. Сиздин дагы катылып жаткан шыгыңыз, өнөрүңүз жазында гүлдөгөн алмадай бажырайсын деп Расул Үсөналиев.
