БИШКЕК, 10-мар. — Sputnik. Жакында Бишкек шаарынын борбордук көчөлөрүндө жалпысынан 5 миң унааны батыра турган "чөнтөк унаа токтотмолор" пайда болорун шаар мэриясынан маалымат кызматынан кабарлашты.
Билдирүүгө караганда, мындай тапшырма 2016-жылы "Бишкекасфальтсервис" ишканасына жүктөлгөн.
"Бишкектин негизги көчөлөрүнүн мүмкүн болгон жерлерине унаа токтотуучу кошумча жайларды даярдоо көчөдөгү унаа тыгынын азайтууга жардам берет", — деп айтылат маалыматта.
Курулуш иштеринен биринчи этабы төмөнкү көчөлөрдө башталды:
- Панфилов көчөсү (Киев көчөсүнөн Бөкөнбаевге чейин);
- Киев көчөсү (Абдрахманов көчөсүнөн Манас проспектисине чейин)
Келечекте:
- Исанов көчөсү (Бөкөнбаев көчөсүнөн Чүй проспектисине чейин);
- Манас проспектиси (Бөкөнбаев көчөсүнөн Жибек-Жолу проспектисине чейин);
- Москва көчөсү (Манас проспектисинен Абдрахмановго чейин).
Аталган көчөлөргө жайгашкан унаа токтотуучу жайлар өзүнө 5 миң унааны батырып, ушул жылдын 1-июлуна чейин бүтүшү пландалууда.
