БИШКЕК, 6-мар. — Sputnik. Индиянын SpiceJet авиакомпаниясынын учагы ажатканадан чыккан жагымсыз жыттын айынан жерге конууга аргасыз болгонун РИА Новости Hidustan Times басылмасына шилтеме берүү менен жазып чыкты.
184 жүргүнчү менен бараткан Boeing-737 учагы Бангалордон Делиге сапар алган. Бирок чукул кырдаалга байланыштуу Хайдарабадда конууга аргасыз болгон.
"Ажатканадан чыккан жагымсыз жыт учкучтардын кабинасына жеткендиктен Делиге бараткан самолет конууга аргасыз болгон", — деп айтылат маалыматта.
Хайдарабаддагы аэропортто учкучтардын кабинасы менен ажатканасына тазалоо иштери жүргүзүлгөн. Ошентип учак Делиге бир саат кечигип келген.
