БИШКЕК, 5-мар. — Sputnik. Бүгүн Ошто "Алымбек датка" этнографиялык комплексинде Ак калпак күнү белгиленди. Бул туурасында шаардык мэриянын маалымат кызматы билдирди.
Аталган иш-чарада майрамдын урматына шардан жасалган төрт метрлик ак калпак асманга учурулган.
"Майрамдык салтанатка Ош шаарынын вице-мэри Нурбек Кадыров, шаардык кеңештин депутаты Ашим Осмонов, аксакалдар, спортчулар, активисттер жана шаар тургундары катышты. Келгендерге ак калпакчан жаштардын бийи көрсөтүлдү. Ошондой эле республикалык, регионалдык мелдештерде жана олимпиадаларда ийлиликке жетишип жүргөн студент, спортчулар ак калпак белекке алышты", — деп айтылат маалыматта.
Эскерте кетсек, 2011-жылдан бери жыл сайын 5-мартта ак калпак күнү белгиленип келет. Былтыр Маданият министрлиги бул күндү расмий белгилөөнү сунуштап, Жогорку Кеңеш 5-мартты Ак калпак жана улуттук кийимдер күнү деп белгилөө жөнүндө токтом кабыл алган.
