БИШКЕК, 26-фев. — Sputnik. Учурда бардык саясий күчтөр биригиши керек. Бул тууралуу экс-президент Роза Отунбаева УКМКнын алдындагы митинг учурунда билдирди.
Белгилей кетсек, "Ата Мекен" фракциясынын лидери Өмүрбек Текебаев бүгүн таңда УКМК тарабынан 48 саатка камакка алынды.
"Текебаевди аэропорттон эл аралык террористтей кылып алып кетишкени баарыбызды өкүндүрдү. Өмүрбектин өлкөгө кошкон салымы зор. Бийликтин Маевскийди бизге белек кылып бергенине рахмат айталы. Анткени анын арты менен жамандыкка каршы күрөшө турган күчтөр биригишибиз керек", — деди Отунбаева.
Эске салсак, депутатка карата кылмыш иши Башкы прокуратура тарабынан козголуп, тергөө иштерин УКМК жүргүзүп жатат.
Жекшемби күнү түнкү саат үчтөр чамасында Текебаев Венадагы иш сапарынан кайтып келер замат "Манас" аэропортунан кармалып, УКМКнын убактылуу кармоочу жайына киргизилген. Бүгүн Базар-Коргон районунда Текебаевдин тарапташтары митингге чыгып, аны бошотууну талап кылуу менен тарап кетишсе, Оштогулар каршылык акциясына чогула баштады.
