БИШКЕК, 24-фев. — Sputnik. Үч жашар Айназик Турдубекованын ичегисине операция жасатуу үчүн керектелген каражат чогултулганын кыздын дарыгери Агзам Данияров билдирди.
Анын айтымына караганда, жалпы 11 миң доллар чогулган (750 миң сом) — бул керектелчү каражаттан 150 миң сомго көп.
"Биз бул сумманы көңүл кош мамиле жасабаган адамдардын арты менен чогулта алдык. Каражат көйгөйү жоюлду. Мындан тышкары, бизге кайрымдуулук фонддор дагы жардам берерин айтышкан. Ошондуктан ашыкча каражат пайда болду. Эми ага муктаж болгон баланы издеп жатабыз", — деди кыздын дарыгери.
Айназикке буга чейин төрт операция жасалган, бирок алар жыйынтыгын берген эмес. Тескерисинче, операциядан кийин акыбалы начарлап кеткен.
Эми кызга Москва шаарындагы профессор Алексей Смирновдун клиникасында операция жасатылмай болду. Айназик шейшемби күнү эртең менен Москвага учуп кетет.
