Нарын сел жана суу ташкындарына каршы турууга даярданып жатат

БИШКЕК, 17-фев. — Sputnik. Кыргыз өкмөтүнүн Нарын облусундагы ыйгарым укуктуу өкүлү Аманбай Кайыповдун жетекчилиги астында жаз айларында күтүлүүчү сел каптоо, суу ташкындарына даярдануу максатында Жарандык коргонуу боюнча пландан тышкаркы атайын машыгуу өттү. Бул тууралуу өкүлчүлүктүн маалымат катчысы Айнура Дүйшөк кызы билдирди.

Машыгууга Нарын облусундагы Жарандык коргонуу комиссиялары, көчүрүү комиссиялары, кызматтар, чарба объектилери жана айыл аймактар тартылды.

Машыгуунун негизги максаты Жарандык коргонуунун башкаруу курамына тез кабар берүү схемасын практикалык түрдө текшерүү, кызматтарды өзгөчө кырдаалдарга карата даярдыкка келтирүү планынын реалдуулугун текшерүү жана тактоо болуп саналат. Мындан тышкары, иш-чара облустук, райондук жана Нарын шаардык Жарандык коргонуу кызматтарынын, мекеме, ишканалардын күч каражаттарын, инженердик техникаларынын даярдыгын практикалык түрдө текшерүү, Нарын облустук Жарандык коргонуунун пландарынын реалдуулугун текшерүү, аларды корректировкалоого багытталды.

Быйылкы жылдын январь-февраль айларында облус аймагында жааган кардын калыңдыгы 80-90 сантиметрге жетип, тоолордо жана кыштоолордо 1 метрден ашып, көп жылдык норманын чегинен жогору болууда. Кыргыз гидрометеорологиялык агенттигинин берген божомолу боюнча февраль айынын үчүнчү декадасында жана март айында калың кар жаашы күтүлүп жатат. Мындан улам аймакта жаз айларында сел каптоолор, суу ташкындары жана өзгөчө кырдаалдар болуусу мүмкүн.