БИШКЕК, 11-фев. — Sputnik. 23-февраль Ата Мекенди коргоочулардын күнүнө карата 11-12 жаштагы балдар жана 14-17 жаштагы кыздар арасында Бишкек шаарынын дзюдо боюнча фестивалы өтөт. Бул тууралуу Бишкек мэриясынын дене тарбия жана спорт башкармалыгы билдирди.
Спорттук мелдеш 22-23-февралда Бишкек шаарындагы Арча-Бешик жаңы конушундагы жаңы курулган ден соолукту чыңдоо борборунда өткөрүлөт.
Бул иш-чаранын максаты Бишкек шаарынын кенже балдар жана кыздар арасындагы курама тобуна талапкерлерди кароо жана дзюдо аркылуу жаштардын ынтымагын бекемдөө болуп эсептелет.
Өспүрүм балдар 29, 32, 35, 38, 42, 46, 50, 55, 60 килограмм салмак категориясы боюнча мелдешсе, кыздар 44, 48, 52, 57, 63, 70 килограмм салмак боюнча күч сынашат.
Билдирмелерин 13-февралга чейин бербеген тараптар фестивалга катышуу мүмкүнчүлүгүнөн ажыратылат.
