БИШКЕК, 9-фев. — Sputnik. Укук коргоо органдары Сокулуктан милиция кызматкерин өлтүрө сүздү деген кишини кармаганын Бишкек ШИИБдин Кайгуул башкармалыгы Sputnik Кыргызстан агенттигине билдирди.
Маалыматка ылайык, жол кырсыгы былтыр 28-ноябрда болгон. Маркум Бишкектеги Кайгуул милициясынын кызматкери болгон. Айдоочу аны коюп кеткенден кийин сөөктү жолдун четине чыгарып, окуя болгон жерден качып кеткен. Honda Stepwagon үлгүсүндөгү машина шек жаратып, аны милиция издей баштаган.
Шектүү жаран Кайгуул милициясынын издөө бөлүмү менен Сокулук районунун кылмыш иликтөө бөлүмүнүн кызматкерлеринин биргелешкен иш-чарасынын жыйынтыгында кармалган.
Жыйынтыгында 35 жаштагы шектүү киши милицияга өзү келген. Ал кырсык болгон күнү жүргүнчү ташып жүргөнүн айтып, жол жакшы көрүнбөгөнүн билдирген. Кишини сүзүп алганда коркуп кетип, окуя болгон жерден качып кеткенин айткан.
Учурда тергөө амалдары жүрүп жатат.
