БИШКЕК, 4-фев. — Sputnik. Тийиштүү көлөмдө каржылоо болсо 2017-жылдын аягына чейин ветеринардык лабораториялар жаңыланарын Айыл-чарба жана мелиорация министри Турдуназир Бекбоев айтканын өкмөттүн маалымат кызматы билдирди.
Министрдин айтымында, азыр ветеринардык лабораториялар курулуп, этабы менен жаңыланып жатат.
"2017-жылга карата республикалык бюджеттен 170 миллион сомдон ашык каражат каралган. План боюнча Баткен жана Талас облустарына ветеринардык лабораториялар курулат. Эгер каржылоо убагында жүргүзүлсө жыл аягына чейин лабораториялар салынып, айрымдары жаңыланып маселе чечилет", — деди министр.
Ал ошондой эле, лабораториялар Балыкчы менен Караколго да ачыларын баса белгиледи.
