БИШКЕК, 2-фев. — Sputnik. Россиянын Новая Москва аймагындагы ири жол кырсыгынан жаракат алган кыргызстандык жарандын абалы оор экенин Тышкы иштер министрлигинен билдиришти.
Белгилей кетсек, 1-февралда жергиликтүү убакыт боюнча саат 15.25тер чамасында Варшава шоссесинде Коротыгино айылына бурула бериш жерде УАЗ менен Toyota Ipsum автоунаалары кагышкан. Анын кесепетинен УАЗ машинасы күйүп кеткен. Ошондой эле Toyota Ipsum унаасы дагы жарым жартылай күйгөн.
"Жергиликтүү укук коргоо органдарынын берген маалыматына ылайык, жол кырсыгынан сегиз киши каза болуп, үч киши жаракат алган. Алардын ичинде Россиянын үч жараны, Өзбекстандын үч жана Тажикстандын эки жараны бар. Каза болгондордун арасында кыргызстандыктар жок", — деп айтылат тараткан билдирүүдө.
Аталган жол кырсыгы боюнча Троицкий жана Новая Москва административдик округу боюнча тергөө башкармалыгы тарабынан кылмыш иши козголду.
