БИШКЕК, 1-фев. — Sputnik. Россиянын Новая Москва аймагындагы ири жол кырсыгынан каза болгондордун арасында Кыргызстандын жарандары жок экенин Кыргызстандын Россиядагы элчилиги билдирди.
Элчиликтен маалымдашкандай каза болгондордун арасында Өзбекстандын, Тажикстандын жана Россиянын жарандары бар.
"Жаракат алгандардын арасында 1994-жылы туулган Кыргызстандын жараны бар. Ал Москва шаарындагы Биринчи шаардык клиникалык ооруканасына жеткирилген. Ал автоунаалардын бирөөнү айдап келе жаткан жана жол кырсыгына себепчи катары айыпталууда. Ага карата кылмыш иши козголушу мүмкүн", — деп элчилик билдирди.
Буга чейин Россиянын айрым ЖМКлары каза болгондордун арасында Кыргызстандын жарандары болушу мүмкүндүгүн жазышкан.
Кырсык болгон жерге КРдин Россиядагы элчилигинен, ИИМдин өкүлчүлүгүнөн жана Миграция кызматынан кишилер барышкан.
