Алай районунун Гүлчө айылындагы №5 "Ак ниет" бала бакчасы 2017-жылдын 26-январынан баштап күнү-түнү иштөө тартибине өттү. Анда 2 жаштан 6 жашка чейинки аралаш тайпа ачылды. Бул туурасында Sputnik Кыргызстан маалымат агенттигине аталган бала бакчанын директору Айнура Тешебаева айтып берди.
Ал аталган бакчада көбүнчө алыс ар кайсы аймактан келген аскер кызматчыларынын, медайымдардын, дарыгерлердин, укук коргоочулардын балдары тарбияланаарын айтты.
"Бул ата-энелер түнкү нөөмөттө тургандыгына байланышуу балдарын жоопкерчиликтүү бирөөгө таштай албай, азыркы учурда кездешип жаткан зордук-зомбулукка кабылбоо максатында бала бакчага мыйзамдуу түрдө тапшырып кетүү үчүн түнкү нөөмөттү ачып берүүнү суранышкан", — деди Тешебаева.
Жыйынтыгында ата-эненелердин суранычы орундалып, балдар кечки саат алтыдан тарта эртең мененки саат жети жарымга чейин болот. Андан кийин кайра өздөрүнүн күндүзгү тайпасына өткөрүлүп берилет.
