БИШКЕК, 25-янв. — Sputnik. Улуттук илимдер академиясынын (УИА) кол жазмалар фондунун 400 000ден ашуун барактан турган онлайн каталогу түзүлдү. Бул тууралуу академиянын маалымат кызматы билдирди.
Каталогдун максаты — изилдөөчүлөргө интернет аркылуу фонддун материалдары менен өз алдынча таанышуу мүмкүнчүлүгүн камсыздоо болуп саналат.
Каталогдогу 3 миңден ашык кол жазманын (401 000 барак) тааныштыруу үлгүлөрү башка керектүү маалыматтары менен чогуу берилген.
"Үлгүлөрдөн сырткары 350 кол жазма толугу менен ачык таанышууга берилген. Ачык кол жазмалардын арасында Калыгул, Белек Солтоноев, Молдо Кылыч, Алыкул Осмонов, Аалы Токомбаев, Түгөлбай Сыдыкбековдун өздүк кол жазмалары жана архивдери, мурун жарык көрбөгөн материалдары бар", — деп жазылат маалыматта.
Ошондой эле раритет китептер, сейрек кездешүүчү макалалар, этнографиялык жана археологиялык экспедициялардын материалдары, 1916-жылдагы Үркүн боюнча архивдик материалдардын көчүрмөлөрүн табууга болот.
