БИШКЕК, 16-янв. – Sputnik. Казакстандын президенти Нурсултан Назарбаев Бишкектин жанындагы учактын кыйроосунан болгон адамдардын өлүмүнө байланыштуу кыргыз элине көңүл айтты. Бул туурасында Акорданын маалымат кызматына шилтеме берип Sputnik Казактан агенттиги жазды.
"Мамлекет башчысы Нурсултан Назарбаев жана жалпы казак эли Бишкектин жанында учак кырсыгынан каза тапкандарга байланыштуу кыргыз элине көңүл айтып, аза кайгысын тең бөлүшөт", — деп айтылат билдирүүдө.
Эскерте кетсек, бүгүн эртең менен Гонконг — Стамбул каттамы менен келе жаткан Boeing – 747 жүк ташуучу учагы "Манас" аба майданына жакын Дача-Суу айылына кулап түшкөн. Учак Бишкекке май куюу үчүн конмок.
Анын кесепетинен 34 адамдын каза болгондугу туурасында ӨКМ жетекчиси Кубатбек Боронов кабарлаган. Анын ичинен 12си балдар экендигин өкмөттүн Чүй облусу боюнча өкүлчүлүгүнөн кабарлашкан.
