БИШКЕК, 16-янв. — Sputnik. Алматы калаасынын тургундары "Манас" аэропортунун жанындагы кыйраган учактан улам жабыркагандарга азык-түлүк жана жылуу кийимдерди чогултууда. Бул тууралуу Sputnik Казакстан агенттиги билдирди.
Казакстандык интернет колдонуучулар социалдык тармактар аркылуу билдирүүлөрдү жазышууда.
"Урматтуу достор! Бишкекте трагедия болуп, бир канча адам каза болду. Ушундан улам жабыркагандарга гуманитардык жардам көрсөтүүнү туура көрдүк. Кайдыгер карабагандарды жардам көрсөтүүгө чакырам", — деп жазды Адель Смит.
Sputnik Казакстан агенттиги кайрымдуулук уюштуруп жаткан "Мен алматылыкмын" (Я алматинец) коому менен байланышкан.
"Биздин уюм кайрымдуулук уюштурууда. Учурда жардамга кол сунгандар көбөйүп жатат. Буюрса чогулган каражаттар жүк ташуучу унаа менен Бишкекке жеткирилет", — деди аталган уюмдун кызматкери Арман Шеген.
Күтүлбөгөн кырсыктан улам жай тургундар үйсүз жана кийим-кечексиз калышкан.
