БИШКЕК, 14-янв. — Sputnik. Экологиялык жактан таза айыл чарба аймактарын кеңейтүү зарыл. Бул тууралуу премьер-министр Сооронбай Жээнбеков Баткен облусуна болгон жумушчу сапарынын алкагында аймактык биофабриканын курулушунун жүрүшү менен таанышуу учурунда билдиргендигин өкмөт кабарлады.
Аталган биофабриканын иштеп баштоосу менен айыл чарба продукциясын дарылоодо химикаттарды пайдалануу кескин кыскарып, микробиопрепараттарды жана энтомофагдарды жакынкы чет мамлекеттерге экспорттоо мүмкүндүгү пайда болот.
Өкмөт башчы белгилегендей, мындай жаңы типтеги биофабрикалар өлкөнүн бардык аймактарында болушу шарт.
"Аталган биофабриканын курулушу башка жергиликтүү өз алдынча башкаруу орган жетекчилери үчүн белги катары кабылданышы керек. Биз экологиялык жактан таза продукцияны өндүргөн өлкө болуубуз зарыл. Мындай биофабрикалардын ишке киргизилиши анын жайылтылышына шарт түзөт", — деди Жээнбеков.
Премьер-министр биофабриканын курулуш иштерин сапаттуу жүргүзүп, курулушту өз мөөнөтүндө жыйынтыктоо тапшырмасын берди.
