БИШКЕК, 7-дек. — Sputnik. Премьер-министр Сооронбай Жээнбеков учурда Жалал-Абад облусунда жумушчу сапары менен жүрөт. Бул тууралуу өкмөттүн маалымат кызматы билдирди.
Сапар алкагында Жээнбеков Базар-Коргон жана Ноокен райондорун кыдырып, айыл чарба, билим берүү тармактарындагы долбоорлорду ишке ашыруунун жүрүшү менен таанышат.
Базар-Коргон районунда өкмөт башчыга "Таза суу" программасынын алкагында калкты таза суу менен камсыздоо боюнча аткарылган иштер тууралуу маалымат берилет. Ошондой эле "Кайырма" айылындагы бала бакчанын курулушу жана Базар-Коргон айылындагы жуучу каражаттарды, бут кийим жана картон кагазын чыгаруучу "Сымай-Гыда" ишканасынын ишмердүүлүгү менен таанышат.
Ноокен районунда Жээнбеков "Майлуу-Суу" суу сактагычын жана курулушу Масы айылындагы спорткомплекстин имаратын көрөт.
Премьер-министр мындан тышкары, Масы жана Бүргөндү айылдарындагы айыл чарба кооперативинин иши жана Ынтымак айылындагы кезектеги мектептин курулушунун жүрүшү менен таанышмакчы.