БИШКЕК, 26-ноя. — Sputnik. Премьер-министр Сооронбай Жээнбеков Токмок шаарындагы социалдык объектилерди кыдырып, анын ичинен Балдар үйүнүн жылуулук менен камсыздалышын көзөмөлгө алды. Бул туурасында өкмөттүн маалымат кызматы кабарлады.
Өкмөт башчы мындан сырткары Дунларов атындагы №10 орто мектептин, Токмок аймактык ооруканасынын жылуулук менен камсыздалышын текшерди.
Балдар үйүнүн директору Татьяна Гринько премьер-министрге борбордук жылуулук тутуму иштебегендигине карабастан, кыска мөөнөт аралыгында мекемедеги балдар жылуулук менен камсыз болуп тургандыгын маалымдады.
"Балдар үйүндө альтернативалык жылытуу булактары каралган, ага жараша бөлмөлөр 20-24 градус жылуу. Бир катар басылмалардын жылуулуктун жоктугу тууралуу жазган маалыматы чындыкка жатпайт", — деди директор.
Жээнбеков Токмок шаарынын мэри Жыргалбек Шамыралиевдин кышкы жылуулук сезонуна карата даярдыгын сындап, тиешелүү иштер өз убагында аткарылганда, көйгөйлөр жаралбайт болчу деген пикирин айтты.
Премьер-министр мэр Шамыралиевге "Токмок-Жылуулук" муниципалдык ишканасын реконструкциялоо боюнча план иштеп чыгып, өкмөттүн кароосуна киргизүүнү жана 2017-жылдан тартып, от казандарды модернизациялоону, жаңы жылуулук тутумун орнотуу боюнча иштерди баштоону тапшырды.
Эске салсак, Жогорку Кеңештин депутаты Өмүрбек Бабанов Токмоктогу балдар үйүнө, мектепке, бала бакчага жана эл жашаган 3-4 үйгө 40 миллион сом карызы бар деп жылуулук берилбей жатканын айткан.
Буга чейин Sputnik Кыргызстан аталган балдар үйүнө барып тартып келген видеодо 15 градуска чейин жылуулук болуп тургандыгын маалымдаган эле.
