БИШКЕК, 23-ноя. — Sputnik. Токмоктогу балдар үйүнө, мектепке, бала бакчага жана эл жашаган 3-4 үйгө 40 миллион сом карызы бар деп жылуулук берилбей жатканын Жогорку Кеңештин жыйынында "Республика — Ата-Журт" фракциясынын лидери Өмүрбек Бабанов айтты.
Бул көйгөй боюнча Токмок шаарынын тургундары депутаттын Facebook баракчасына жазып, кабарлаган.
"Имараттардын ичинде 10 градус эле жылуу экен. Бишкектен болгону 60 чакырым алыс турган жерде жылуулук жок болгону кандай? 40 миллион сом карызы бар деп эле жылуулук бербей коюш керекпи? Өкмөт керек болсо ошону сүйлөшүп, жаап берсе болот эле да. Карызы бар экен деп Балдар үйүндө жашап жаткан кичинекейлерди суукка тоңдурабызбы?" — деп суроо салды депутат.
Бабанов ошондой эле Токмоктогу социалдык имараттардын баарына жылуулук берилди деген маалымат чындыкка дал келбей турганын айтып, бул маселени тез аранын ичинде чечүү керектигин кошумчалады.
Өкмөттүн Жогорку Кеңештеги туруктуу өкүлүнүн орун басары Кылычбек Абышев бул маселе өкмөттүн көзөмөлүндө экенин билдирди.
"Токмоктогу бул маселе боюнча өкмөттө маалымат бар. Биринчи вице-премьер-министр Мухамметкалый Абулгазиев жыйын өткөрүп, тиешелүү аракеттер көрүлүүдө", — деди ал.
Аталган суроо боюнча Токмок шаардык мэриясына кайрылганыбызда, телефондон эч кандай маалымат берилбей турганын билдирип, кат жүзүндө кайрылуу керектигин айтышты.
