Токмоктогу балдардын адистештирилген үйүнө жылуулук куурлардагы жарылуудан улам берилген эмес. Бул тууралуу Токмок шаарынын мэри Жыргалбек Шамыралиев Sputnik Кыргызстан агенттигинин кабарчысына билдирди.
Балдар үйүнө агенттиктин кабарчысы келген убакта электр жылыткычтары сайылбаган бөлмөдөгү жылуулук 15 градус цельсияны түздү.
"Батареялар муздак. Жылуулукту бейшемби күнгө чейин беребиз деп жатышат. Ошентсе да сууктан улам жайылып кетүүчү жугуштуу оорулар бизде катталган жок", — деди балдар үйүнүн директору Татьяна Гринько.
Сууктун күнүндө балдар үйүндө жылуулуктун жоктугу социалдык тармактарда кызуу талкууга алынып, бул маселени айрым депутаттар Жогорку Кеңештин жыйынында да көтөрдү. Социалдык объектилердин 44 миллион сом карызынан улам жылуулук берилбей келгени айтылган.
