БИШКЕК, 25-ноя. — Sputnik. Эрежесиз эр мушташ ММА боюнча белгилүү россиялык мушкер, зордуктоо айыбы менен жазага тартылган Александр Емельяненко Воронежский облусундагы Борисоглебский колониясынан бошотулганы тууралуу РИА Новости спортчунун адвокаты Кахабер Долбадзеге шилтеме берип маалымдады.
Белгилей кетсек, Александр Емельяненко Федор Емельяненконун иниси.
Бейшемби күнү Воронеж облустук соту Емельяненкого түрмөдөгү өтөбөй калган мөөнөтүнүн ордуна эки жыл түзөтүү жумуштарында иштейт деген чечим чыгарды.
"Александр эркиндикке чыгарылды, баары жакшы. Ал Старый Осколдогу апасына жөнөдү", — деди Долбадзе телефондон.
Емельяненко 2015-жылдын май айында 4,5 жылга эркинен ажыратылып, түрмөгө отурган. Кийин сот 2 жыл 23 күндүк мөөнөтүн эркиндикте түзөтүү жумуштарына алмаштыруу боюнча чечим чыгарган. Бирок бул чечимге прокуратура нааразычылыгын билдирип, 24-ноябрда ал кайра каралган болчу.
