БИШКЕК, 15-ноя. — Sputnik. Премьер-министр Сооронбай Жээнбеков айыл чарба, тамак-аш өнөр жайы жана мелиорация министрлигинин түзүмүн оптимизациялоо боюнча токтомго кол койгонун өкмөттүн маалымат кызматы билдирди.
Ага ылайык, токтом менен министрликтин жаңы жобосу бекитилет.
"Карантин жана өсүмдүктөрдүн фитосанитардык көзөмөлү боюнча функция Ветеринария жана фитосанитардык коопсуздук мамлекеттик инспекциясынан алынып, Айыл чарба министрлигинин алдында кайтадан түзүлгөн фитосанитария жана өсүмдүктөрдүн карантини боюнча департаментке берилди", — деп айтылат маалыматта.
Ошондой эле республикалык үрөн инспекциясынын базасында дан эгиндеринин экспертиза департаментинин бирдиктүү органын түзүү каралган.
Андан сырткары, этил спиртин өндүрүү, же импорттоону көзөмөлдөө боюнча мамлекеттик жөнгө салуу функциясы Мамлекеттик салык кызматы менен Экономика министрлигинен алынып, Айыл чарба министрлигине берилмей болду.
