БИШКЕК, 14-ноя. — Sputnik. Москва, Санкт-Петербург шаарларына жана Борбордук Азияга теракт уюштурууну пландап кармалгандар тууралуу маалымат тажик жаранын суракка алгандан кийин белгилүү болду. Бул тууралуу Sputnik Тажикстан өлкөнүн Ички иштер министрлигинин маалыматына таянып жазган.
Белгилүү болгондой согушкерлер "Ислам мамлекети" террордук уюмуна катыштыгы бар экенин моюндарына алышкан.
Операция Россиянын Ички иштер министрлигинин колдоосу менен Кыргызстан, Тажикстан жана Россиянын атайын кызматтары менен биргелешкен аракетинин жыйынтыгында ишке ашкан.
"Ыкчам иликтөө иш-чарасынын жыйынтыгында Россияда Тажикстандын И.Д аттуу жараны кармалган. Ал "Ислам мамлекети" террордук уюмунун тарапташы И.К аттуу бир тууганынын көрсөтмөсү менен Сирияга бармак. Кармалгандан кийин ал Тажикстанга экстрадицияланды", — деп жазылат Тажикстандын ИИМ маалымат кызматынын билдирүүсүндө.
Укук коргоо бөлүмүнүн билдирүүсүндө кармалган баланын маалыматтарына таянып, Кыргызстан, Тажикстан, Россия күч түзүмдөрү Москва жана Санкт-Петербург шаарларынан Борбордук Азиянын 12 жаранын кармашкан. Алардан ок атуучу куралдар жана жардыруучу заттар табылган.
Кармалгандардын аттары тергөөдөн улам айтылбайт.
