БИШКЕК, 14-ноя. — Sputnik. Нарын облусунун Кочкор районундагы Ак-Жар айылынын Ак-Булуң аймагынан 4-класстын окуучусун талаган карышкырдан кутурма дарты аныкталган жок. Бул тууралуу Нарын облустук ветеринардык инспекциясынын башчысы Жалил Алымкулов Sputnik Кыргызстан агенттигине билдирди.
Анын айтымында, текшерүүнүн жыйынтыгы кырсык болгон күндүн эртеси эле чыккан.
"Карышкыр таза, анда кутурма дарты жок экени аныкталды. Бирок профилактикалык иштер жүрүп жатат", — деди Алымкулов.
4-класстын оккучусунун атасы Бактыяр Кутушев баласы мурдагыдан жакшы болуп калганын айтты.
"Учурда апасы жанында. Баштагыга караганда абалы жакшы", — деди ал.
Белгилей кетсек, 8-ноябрда дөбөт карышкыр 4-класстын окуучусун талаган. Анын атасы Бактыяр Кутушевдин айтымында, окуя үйдөн 50 метрдей аралыкта сарайдын жанында болгон. Ал өзүнүн жана инисинин 2-класс окуган баласын сарайдагы тоокторго жем чачып келгиле деп жиберген. Балдар сарайдан келе жатканда аларга карышкыр кол салган. Бөрүнү ошол жерден эле Кутушевдин кошуналары атып өлтүрүшкөн.
