БИШКЕК, 4-ноя.— Sputnik. Президент Алмазбек Атамбаев ЖМК өкүлдөрүн кесиптик майрамы менен куттуктап, энчилүү саат жана акчалай сыйлык менен сыйлады.
Өз сөзүндө өлкө башчы жалпы ЖМК өкүлдөрүн келе жаткан 7-ноябрь кесиптик майрамы менен куттуктап, өлкөдө журналистика ишмердүүлүгүнүн ролу маанилүү экенин белгиледи.
"Мен силерди кесиптеш деп айтсам да болот, анткени сөздүн күчүн жана ордун билем ", — деди Атамбаев.
Президенттин айтымында, ар бир маалымат каражатынын өкүлү менен жолугушуу маанилүү.
"Мен ар дайым азыркы учур журнисттердин кылымы экенин айтып келем. Маалыматка ээлик кылган адам дүйнөнү башкарат деген сөз бекеринен айтылбаса керек. Бүгүнкү учурда маалыматты курал катары колдонуп калышты. Сөз менен адамдын көңүлүн жылытып да, түшүрүп да койсо болот", — деди президент.
Өлкө башчы бардык ЖМК өкүлдөрүнө бакыт, ийгилик жана узак өмүр каалап өттү.
