Кечээ күнү кесиптешибиз Расул Үсөналиев той берип, элден бата алды. Кайгыны тең тартсаң билинбейт, кубанычты тең бөлсөң бөлүнбөйт демекчи, кесиптештер Раскенин жакшылыгын тең бөлүшүп кайттык.
Тамада кандай болгонун айта албайм го, бирок Канышай эже "Чагылганды" укмуш ырдады, эй! Ооба, бий боюнча алдына адам салбаганын билген жайым бар. Бирок мынчалык үнү бар экенин такыр билген эмесмин. Кыскасы Канышай эжекем ырдаганда зал бир дем менен тыңшап, алакандар кызарганча кол чабуулар болду. Мындан ары караокеге барганда микрофонду кимге сунаарды билип алдык. Ал эми сөз кезеги Sputnik Кыргызстан агенттигинин журналисттерине келгенде, бир сапка тизилип кара жорго бийлеп чыкканы өзгөчө таасир калтырды. Ал эми Нургүл эженин каалоо-тилеги тосттордун алдыңкысы болсо, Айида бийдин майын чыгарды. Бир сөз менен айтканда, кесиптештер керекке жарап, тойдун көркүн ачышты. Ынтымагыбыз арта берсин.
Мындан сырткары кечээ күнү манасчы Дөөлөт Сыдыков Уфада өткөн айтуучулар сынагынан 1-орун алса, кыл кыякчы Залина Касымова Москвада өткөн сынактан байгелүү кайтты.
Баягы эле бүтпөгөн сулуулар конкурсу уланып, "Жер сулуусу" болуп эквадорлук бийкеч таанылды.
Мындан сырткары эл аралык космостук станция экипажынын үч космонавты жерге конду.
Ал ортодо кыргызстандык балбан Каныбек Жолчубеков грек-рим күрөшү боюнча студенттер арасындагы дүйнөлүк мелдеште алтын медалга ээ болду.
Эгерде футбол жылдызы Азамат Байматовдун ийгиликке кантип жеткенин билгиңиз келсе, бул жакка баш багыңыз.
Түштүк кореялык PSY аттуу ырчынын "GENTLEMAN" ырынын видеоклибин YouTube каналынан көргөндөрдүн саны бир миллиарддан ашты.
Бүгүн буюрса күн ачык болот.
Валюта наркы. Бүгүн сомдун баасы долларга карата орто эсеп менен 68.20 (сатып алуу) жана 68.78 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 36.50 сом, Аи-95 үлгүсүндөгү бензин 39.00 сом, ал эми дизель майы 34,50 сомдон сатылууда.
Соңку сөз ордуна: Иштеген тойлогонду… ой, эс алганды да билет.
Тойлор тойго улансын. Исмаил Мамытов.
