БИШКЕК, 30-окт. — Sputnik. Кыргызстандык балбан Каныбек Жолчубеков грек-рим күрөшү боюнча студенттер арасындагы дүйнөлүк мелдеште алтын медалга ээ болгонун чемпионаттын расмий сайтына жарыяланды.
Түркиянын Чорум шаарындагы чемпионат 26-октябрда башталып, эртең жыйынтыкталат. Ал эми Жолчубеков килемге 29-октябрда 59 килограммга чейинки салмак категориясында беттешти.
Эки ирет катары менен жеңишке жетишкен кыргызстандык балбан жарым финалда россиялык спортчу менен таймашты. 5:2 эсебинде атаандашын утуп алган Жолчубеков алтын медаль үчүн ирандык Фаршад Исвандмахмуди менен күрөшүп, аны 7:2 эсебинде жеңди.
Чемпионаттын алгачкы күнүндө кыргызстандан барган балбан кыз Мадина Надирова 48 килогарммга чейинки салмак категориясында күч сынашып, коло медалга ээ болгон.
