ИИМ: Сузактагы окуучунун өлүмү боюнча кылмыш иши козголду

БИШКЕК, 27-окт. — Sputnik. Асынып калган 9-класстын окуучусу Шерзат Алимбековдин ата-энесинин арызынын негизинде Сузак РИИБи кылмыш ишин козгогонун Ички иштер министрлигинин маалымат кызматынын өкүлү Эрнис Осмонбаев билдирди.

Эскертсек, 23-октябрда мектеп окуучусу Сузак районунун Сымкат айылындагы үйүндө асынып калган. Маркумдун туугандары аны айылдашы кордоп уруп, "10 миң сом менен пневматикалык курал уурдадың" деп моюнга алдырууга аракет кылганын айтышууда.

"Кылмыш иши каза болгон окуучу баланын ата-энесинин арызынын негизинде Кылмыш жаза кодексинин 234-беренеси "Бейбашчылык" боюнча кылмыш иши козголду. Иш оор: туугандары анын сабалганын, ур-токмокко алгандар аны өз өмүрүнө кол салууга чейин жеткирген деп жатышат. Экинчи тарап булардын баарын төгүнгө чыгарып, окуя таптакыр башкача болгонун айтышууда", — деди Осмонбаев.

Анын айтымында, тергөө амалдары жүрүп, соттук-медициналык экспертиза дайындалды. Ал эми ИИМдин өздүк коопсуздук кызматы милиционерлерге карата да териштирүү башталганын кошумчалады.

Осмонбаев айыпталып жаткан жарандын баш коргоо чарасы карала электигин белгиледи.

Сузактагы окуучу баланын асынып өлгөн окуясынын чоо-жайын Sputnik Кыргызстан агенттиги даярдаган материалдан окуңуз>>