Курбанова 2014-жылдын октябрь айларында баласынан таяк жеп, башы дубалга катуу тийгендиктен эс-учун жоготуп, баш мээси чайкалганын муңдуу эскерди.
"Жолдошум 2010-жылы каза болуп калды. Бир жылдан кийин эле документтерди даярдап эки кабаттуу үйдү баламдын атына жаздырып койгом. Балээнин бардыгы балам үйлөнгөндөн кийин башталды", — деди Курбанова.
Ал үйсүз калгандыктан бир нече жылдан бери ар кимдин үйүндө баш калкалап жүргөнүн айтат.
"Балам үйдү кайдагы бир сектага берип салат деп ойлоп жатат. Бирок ал жаңылышат. Андай эч качан болбойт", — деди эне.
"Апам Йеговы күбөлөрү агымына кирип кеткенден кийин үйгө ар кандай кишилер келе баштады. Тамды кайдагы бир сектага бере турган болду. Ошонун айынан чыр чыгып, үйдөн кетип калды. Апам менен бир нече ирет жолугуп үйгө келип жаша деп айткам. Бирок макул болгон жок. Ал үйдү сыйынуучу жайга айлантууну каалап жатат. А менин үй-бүлөм, балдарым бар да", — деди Курбанованын баласы.
Ал эми Курбанова баласы канчалык жаман мамиле жасаганына карабастан ага жамандык каалабай тураганын айтып ыйламсырады.
