"Тазалыктын" кызматкери Эркин Алмакеевдин айтымында, ал түндө базардын аймагын аялы менен тазалап жүргөн. Бир маалда эле аялы кыйкырганынан барса бейтааныш киши аялын кармап, зордуктоого аракет кылган.
"Таштандыны арабага салып, жарым мүшөгү батпай калганда аялым аны таштандыга көтөрүп кеткен. Бир маалда аялым кыйкырып калды. Бейтааныш киши аялымды кармап алыптыр. Мен барсам колуна күрөк алып алыптыр. Аны колунан алсам, таштанды салган челекке түшүп кетти", — дейт Алмакеев.
Алмакеевдин аялы 32 жаштагы Алинанын айтымында, базардын ичин тазалап, таштандыны төгөйүн деп баратканда аны бир киши келип зордуктаганга аракет кылганын айтат.
"Мен качып кеттим. Ары жактан күйөөм келип тигил киши менен мушташты. Ал туугандарын чакырып, төртөөлөп күйөөмдү сабап кетти", — дейт ал.
Экинчи тарап болгон салыкчы Ариет Мамажакыповдун айтымында, ал кафеден чыгып, заара кылганы таштанды төккөн жакка өткөн. Заара кылып жатса бир аял келип эмне кылып жатасың деп кыйкырган.
"Мен сөгүп жиберип, экөөбүз айтыша кеттик. Эри туура эмес түшүнүп калып эле мени муштап кетти. Көптөп уруп коюшту, күрөк менен уруп, таштанды таштаган челекке ыргытып салды", — деди ал.
Ал ортодо Ош ОИИБдин маалымат кызматынын башчысы Жеңиш Ашырбаев учурда мушташтан жабыр тарткандардын үстүнөн соттук-медициналык экспертиза дайындалганын жана анын жыйынтыгы менен кайсы берене менен кылмыш иши козголору аныкталарын билдирди. Ал өз сөзүндө милиция кызматкерлери кеч келди деген дооматтар чындыкка коошпой турганын айтты.
