БИШКЕК, 3-окт. — Sputnik. Facebook социалдык тармагында YouTube каналындагы видеого шилтеме камтылган жаңы вирус пайда болду. IT-адис Михаил Дудин Sputnik Кыргызстан агенттигине зыян апкеле турган программадан кантип арылууга болорун айтып берди.
Анын айтымында, бул — пайдалануучунун браузерин жабыркатуучу "эски жаңы вирус", учурда ал кайрадан жайылып жатат.
"Бир караганда анын эч зыяны жоктой. Бирок сыр сөздөргө, билдирүүлөргө, пайдалануучулардын башка жеке маалыматтарына жол ачышы толук мүмкүн", — деди Дудин.
Адистин айтымында бул вирус менен жеңил эле жабыркоого болот. Бул үчүн билдирүүдөгү видео шилтемени ачуу жетиштүү. Мындан тышкары, Facebook тармагынан башка сайтка өтүүдө да кабылууга болот.
"Пайдалануучу башка материалга өтүү үчүн шилтемедеги даректи басып, башка сайтка өтөт. Вирус дароо "жугуп", анын көзөмөлүсүз эле башка аккаунттарга кете баштайт", — деди эксперт.
Вирустан арылуу үчүн күмөн жараткан браузерлерди өчүрүп салуу керек экенин Дудин белгилеп өттү.
"Facebook менен браузердеги бардык паролдорду өзгөртүп салуу керек. Мындан тышкары браузердеги кэшти тазалап, компьютерге антивирус орнотуу зарыл. Ал эми антивирус орнотулбаган компьютерлерге бекер кичи программаларды колдонсо болот", — деп ырастады адис.
Үстүбүздөгү жылдын апрель айында интернет тармагында Live-Sex! аттуу вирус пайда болгон. Ал My First Video вирусуна окшош болчу. Экөө тең Косоводо бир доменге катталган.
