БИШКЕК, 1-сен. — Sputnik. Көчмөндөр оюндарында кызмат кылуу үчүн борбордук медициналык мекемелерден 50 кызматкер Ысык-Көл облусуна жиберилгенин саламаттык сактоо министри Талантбек Батыралиев билдирди.
Ал ошондой эле "Манас" аэропортунан Ысык-Көл облусуна чейинки жолдо Тез жардам кызматынын 18 автоунаасы дагы нөөмөттө турарын кошумчалады.
"Чолпон-Ата шаарынын ооруканасына кошумча 20 керебет коюлду, Ананьевого дагы 10 орун кошумчаланды", — деди министр.
Андан сырткары, ӨКМдин Ыкчам башкармалыгынын жетекчиси Урматбек Шамырканов Дүйнөлүк көчмөндөр оюндары учурунда нөөмөткө чыгуу үчүн 300дөн ашык куткаруучу жиберилгенин билдирди.
Шамырканов "Манас" — Балыкчы — Чолпон-Ата — Кырчын — Каракол кан жолунда күнү-түнү куткаруучулардын 38 тобу иштей турганын баса белгиледи.
