БИШКЕК, 9-авг. — Sputnik. КРдин тышкы иштер министринин орун басары Динара Кемелова менен Тажикстандын ТИМинин жетекчисинин орун басары Махматшариф Хакдод менен Душанбе шаарында жолугуп, суу энергетикалык маселелер талкууланганын КР ТИМдин маалымат кызматы билдирди.
Кемелова Тажикстанга 9-11-августта боло турчу суу жана санитарияга байланышкан эл аралык симпозиумга катышуу үчүн келген.
"Кемелова менен Хакдод эки тараптуу кызматташууну мамлекет башчыларынын деңгээлине чыгарууну жана эки мамлекеттин тышкы иштер министрликтеринин кызматташуусун талкуулашты. Ошондой эле, кыргыз-тажик тарапка тең өз ара пайдалуу болгон саясий, суу энергетикалык, транспорт-коммуникациялык жана маданий гуманитардык тармактагы актуалдуу маселелер каралды", — деп айтылат ТИМ тараткан билдирүүдө.
Андан сырткары тараптар соода-экономикалык кызматташтыкты дагы кеңейтүүнү талкуулашкан.
