БИШКЕК, 6-июл.— Sputnik. Кыргызстандагы "Хан-Теңир" жана "Сары-Чат — Ээр-Таш" мамлекеттин коруктарында коюлган фотокапкан жапайы айбанаттардын ичинен аюу, илбирстен тарта аркар, элик баштаган бир топ жаныбарларды тартып калган.
Камераларды орнотуп, изилдөө жүргүзүүнүн максаты —"Хан-Теңир жана "Сары-Чат — Ээр-Таш" мамлекеттик коруктардын аймагындагы жаныбарлардын көбөйүү жолдорун аныктоо экенин УИАнын биология-жер кыртышы боюнча институтунун адиси Аскар Давлетбаков айтып берген.
17 камера апрель айында аталган аймактардагы капчыгайларга, өзөндөргө, тоонун боорлоруна жана кыялардын баштарына орнотулган.
Үч-Чат тоо кыркаларындагы Арпатектир өзүнүндөгү камерага чак түштө өтүп бараткан илбирс түшүп калган. Ал эми Урокыр тоолорундагы Ак-Талаа суусундагы техника аркардын ургаачысын козусу менен кошо тартып калган.
Ал эми Кичи-Талды-Суу капчыгайындагы камерага түнү коёндор, ал эми күндүзү элик түшкөн.
Камералар Айлана-чөйрөнү коргоо жана токой чарбасы боюнча мамлекеттик агенттиктин Жаратылыш ресурстарын сарамжалдуу колдонуу департаменти жана Улуттук илимдер академиясынын биология-жер кыртышы боюнча институтунун адистери тарабынан коюлган.
"Фотокапкандардан "Хан-Теңир" жана "Сары-Чат — Ээр-Таш" мамлекеттик коруктарды жердеген жапайы жаныбарлар Ак-Талаа жана Арпатектир суулары аркылуу өтөрүн көрдүк. 17 камера койдук эле, аларга бир топ жаныбар түшүптүр", — деди Давлетбаков.
Кыргызстанда экологиялык жолдорду уюштуруу боюнча жогорку демилге ПРООН менен Глобалдык экологиялык фондунун Тянь-Шань тоолорунун аймагындагы өзгөчө коргоого алууну жакшыртуу долбоорунун алкагында жасалып келет.
