БИШКЕК, 29-июн. — Sputnik. Депутаттар өкмөттүн жаңы курамына талапкерлерди шайлашты.
Жогорку Кеңешке талапкерлерди сунуштаган өкмөт башчы Сооронбай Жээнбеков алардын барына ишеним артаарын жана өз ишинин мыктылары экенине ишенерин билдирди.
"Кызматтарга сунушталып жаткандар тажрыйбасы мол, билимдүү инсандар. Алар ишеничти толук актайт деп айта алам. Андыктан колдоп берсеңиздер", — деди Жээнбеков.
Ага ылайык: Чек ара маселеси боюнча вице-премьерликке Жеңиш Разаковдун, Айыл чарба, азык-түлүк, өнөр жайын өнүктүрүү жана мелиорация министрлигине Турдуназир Бекбоевдин, Транспорт жана жол министрлигине Замирбек Айдаровдун, Өнөр жай, энергетика жана жер казынасын пайдалануу комитетинин жетекчилигине Дүйшөнбек Зилалиевдин, Мамлекеттик маалыматтык технологиялар жана байланыш комитетинин жетекчилигине Бакыт Шаршембиевдин талапкерлиги жактырылды.
Эске сала кетсек, буга чейин Жогорку Кеңеш премьер-министр Сооронбай Жээнбековдун өкмөттүн түзүмүн өзгөрүү боюнча сунушун жактырган.
