БИШКЕК, 17-июн. — Sputnik. Премьер-министр Сооронбай Жээнбеков өкмөт курамындагы эки министрликти өзгөртүп, дагы эки комитет түзүп жатат. Бул тууралуу өкмөттөгү булак билдирди.
Анын билдиришинче, Жогорку Кеңештин төрагасына өкмөттүн түзүмүн өзгөртүү сунушун кезексиз карап берүү өтүнүчү менен кат жолдонду.
"Кыргызстандын Евразиялык экономикалык биримдикке кириши менен өнөр жай, энергетика, айыл чарба, байланыш, кен жана электрондук байланыш жаатында узак мөөнөттүү саясатты активдештирүүнү талап кылууда", — деди булак.
Мындан улам Өнөр жай, энергетика жана кен иштетүү мамлекеттик комитетин, ошондой эле Маалыматтык технология жана байланыш мамлекеттик комитетин түзүү сунушталды. Андан сырткары, Айыл чарба жана мелиорация министрлигин Айыл чарба, азык-түлүк өнөр жайы жана мелиорация министрлигине, ал эми Транспорт жана коммуникацияар министрлигин Транспорт жана жол чарбасы министрлигине өзгөртүү сунушу берилди.
Премьер-министрдин пикиринде, жаңы түзүм бардык чакырыктар менен тобокелчиликтерге туруштук берүүгө жөндөмдүү болот. Аталган сунуш Финансы, Экономика жана Юстиция министрликтери тарабынан колдоого алынды.
