БИШКЕК, 15-июн. — Sputnik. Нөшөрлөгөн жаандан улам Ысык-Көл облусунун бир катар райондорунда каналдагы суулардын деңгээли көтөрүлүп, көпүрөнү жана жолдорду алып кетүү коркунучун жаратты. Учурда селдин алдын алуу боюнча бардык күч тартылганын ӨКМ билдирди.
Маалыматка ылайык, Тоң районунда 14-июнда түнкү саат 20:30 чамасында Темир-Канат айылынын түштүк-чыгыш тарабынан өткөн каналдагы суунун деңгээли көтөрүлүп, көпүрөгө жана айылга коркунуч жараткан. Жарандык коргонуунун күчтөрү күчөтүлгөн режимде иштеп, кооптуу аймактар атайын комиссия тарабынан көзөмөлдөнүүдө.
Кырсыктын алдын алууга жалпысынан Ак-Суу райондук Жарандык коргонуу кызматы тарабынан 285 адам, жети атайын техника тартылган.
Өзгөчө кырдаалдар министри Кубатбек Бороновдун буйругу менен ӨКМдин Ысык-Көл облустук башкармалыгынын башчысы полковник Замирбек Жумагазиев кооптуу аймактарда жүрөт жана жергиликтүү бийлик менен биргеликте жеринен чечимдерди кабыл алууда.
Облустагы кырдаалды министр өзү жеке көзөмөлүнө алды.
Белгилей кетсек, нөшөрлөгөн жаандан улам Нарын облусунун Ат-Башы районундагы бир катар айылдарда да сел жүрүү коркунучу пайда болгон.
