БИШКЕК, 15-июн. — Sputnik. Нарын облусунун Ат-Башы районунда 14-июнда саат 18:30дан 22:30га чейин тынымсыз жааган катуу жамгырдын жана тоодон агып келген агын суулардын кесепетинен райондо сел жүрүү коркунучу жогорулаганын ӨКМ билдирди.
Маалыматка ылайык, Баш-Кайыңды айылында түнкү саат 22:30да "Кайыңды" суусундагы көпүрөнү толугу менен суу алып кеткен. Ошондой эле 600 метрлик дамбанын 50 метрге чукул жерин суу алып кетүү коркунучу бар. Аны алып кетсе 50-60 турак жайды суу капташы мүмкүн.
Мындан тышкары, Ат-Башы — Босого автожолунун 20-чакырымынан 38-чакырымына чейинки аймактарынын 12 жеринен суу жеп кетүү коркунучу пайда болгон.
Ат-Башы суусунун жээгиндеги дамбаны көзөмөлдөө жана жарандардын сууга түшүп кетүүсүнүн алдын алуу максатында айылдык ыктыярдуу төрт куткаруучу кезметке коюлду.
Райондук жарандык коргонуу комиссиялары координациялоо жана алдын алуу иш-чараларын жүргүзүшүүдө.
Бул абалды өзгөчө кырдаалдар министри Кубатбек Боронов жеке көзөмөлүнө алып, ӨКМдин Нарын облусу боюнча башкармалыгынан түзүлгөн ыкчам топту абалды жеринен тактоо үчүн жөнөттү.
