БИШКЕК, 3-июн. — Sputnik. Кыргызстандын футбол боюнча улуттук курамасынын башкы машыктыруучусу командасынын оюнуна канааттанган жок. Бул тууралуу КРдин Футбол федерациясы билдирди.
Кечээ, 2-июнь күнү Ош шаарында улуттук курама команда менен "Алай" футболдук клубдары беттешип, жергиликтүү клуб 1:0 эсебинде жеңишке жеткен. Оюндагы жалгыз голду Алия Силла пенальтиден киргизген.
"Команда өтө начар оюн көрсөттү. Мен оюнчуларга такыр канааттанган жокмун. Беттеш боюнча сөзсүз түрдө териштирүү болуп, каталарды аныктайбыз", — деди машыктыруучу.
Ал оюнчулардын каталары азыр билингени жакшы болгонун кошумчалады.
Эскерте кетсек, беттеш 7-июндагы Иран командасы менен жолдоштук оюнга даярдык катарында өткөн.
