БИШКЕК, 31-май — Sputnik. Үйлөнүү үлпөтү кыргыз коомчулугундагы эң чоң шаан-шөкөттүн бири. Той өткөрүү үчүн кээ бир жарандарыбыз өмүр бою чогулткан каражаттарын чачып коюштан деле кайра тартпайт. Жүз жылда жер жаңы, элүү жылда эл жаңы дейт. Азыркы жаштар үйлөнүү тойлорун дүркүрөтүп өткөрүүнү адатка айланткандай.
Чет өлкөдө баш кошкон жаштарыбыз кымбат баалуу унааларды жасап алып, Американын, Дубайдын жана Москванын көчөлөрүн кыдырганды жактырышат. Муну да аз дегендер яхта менен саякаттап, Тынч океан жээгинде кара жорго бийлешет.
Филадельфиядагы кыргыздардын үйлөнүү тою — "люкс" унаалар жана АКШнын байыркы шаарындагы ресторандардын бириндеги кече.
Чикагодогу той — ак периштеге айланган кыз жана ак боз атчан ханзаада. Жаштар Мичиган көлүндө яхтада тойлошкон.
Бул тойдо үйлөнүп жаткан жигиттин достору кара жоргону катыра бийлегендиги менен көпчүлүктүн эсинде калган. Салтанат Мичиган көлүнүн жээгинде өткөн.
Жаштар Чикагодо бири-бирине шакек тагышып, өмүр бою бир болууга убада беришкен соң, тойлогону ресторанга жөнөшкөн.
Ал эми бул үлпөт Чикагодогу эң кымбат делген мейманканалардын биринде өткөн.
Өзгөчөлүктү жактырган бул кыргыз жаштары Тынч океанынын жээгинде майрамдашып, яхта менен саякатка чыгышкан.
Москванын чок ортосундагы кыргыздардын үйлөнүү тою — ак калпакчан мырзалар менен кыргыз көйнөкчөн кымча бел сулуу бийкечтер.
Жомоктогу үлпөт — кыргыз жаштары Дубайда баш кошуп, дүйнөнү таң калтырган фонтандарды аралып басып, яхтада майрамдашкан.
