БИШКЕК, 24-май — Sputnik. Салык кызматынын адиси 1000 доллар пара алып жаткан жеринен кармалды. Бул тууралуу УКМКнын Коррупцияга каршы кызматы билдирди.
Маалыматка ылайык, үстүбүздөгү жылдын 13-майында УКМКга жеке ишкер арыз менен кайрылган. Анда салык кызматынын адиси ишкерден салык төлөмдөрүн азайтып берүү үчүн акча талап кылып жатканы айтылган.
Үстүбүздөгү жылдын 18-майында жүргүзүлгөн тергөө иш-чараларынын алкагында Мамлекеттик салык кызматынын Аламүдүн району боюнча адиси миң доллар алып жаткан жеринен колго түшкөн.
Бул факты боюнча Кылмыш жаза кодексинин 304 (Кызматтык абалынан кыянаттык менен пайдалануу) жана 313 (Опузалап пара талап кылуу) беренелерине ылайык кылмыш иши козголгон.
2016-жылдын 20-майында Бишкек шаарынын Биринчи май райондук сотунун чечими менен салыкчы камакка алынды.
