БИШКЕК, 23-май — Sputnik. Президент Алмазбек Атамбаев кол койгон "Кыргыз Республикасынын Жарандык процесстик кодексине өзгөртүүлөрдү киргизүү жөнүндө" мыйзамына ылайык, эми сот мамлекет тарабынан жеке менчиктеги жер тилкелерин мажбурлоо менен алып коюу боюнча чечимди бир айдын ичинде кабыл алышы керек.
Документ Жогорку Кеңеш тарабынан 2016-жылдын 6-апрелинде кабыл алынган.
Ага ылайык, жер адилеттүү нарк менен бааланып, сатып алуу соттун чечими боюнча жүрүшү зарыл.
Коомдук муктаждыктар үчүн жер участокторун алуу ыйгарым укуктуу орган менен жер тилкесинин ээсинин же жерди пайдалануучунун ортосундагы келишимдин негизинде жүргүзүлөт. Эгер жердин ээси сатууга каршы болсо, мамлекеттик орган сотко кайрылууга укуктуу. Өзгөртүүлөргө ылайык, сот арызды бир айдын ичинде карап, тийиштүү чечим чыгарып бериши керек.
