БИШКЕК, 23-май — Sputnik. Келерки жылдан тарта Бишкек мэриясы ысык сууну июлдун орто ченинен тарта өчүрүүнү чечти. Бул тууралуу муниципалитет билдирди.
Ал эми негизи ысык суу 10-майдан 10-июнга чейин өчүрүлүп келет.
Буга чейин Бишкек шаарынын мэри Албек Ибраимов Sputnik Кыргызстан агенттигинин кабарчысына мындай өзгөрүүлөр шаар тургундарына ыңгайлуу шарт түзүү максатында жүргүзүлүп жатканын айткан.
"Жарандар бул маалда ысык сууга караганда муздак сууну көп керектешет. Челекке суу куюп күнгө койсо, бат эле ысып чыгат. Мындан тышкары, жай мезгилинде көпчүлүк Ысык-Көлгө эс алганы кетип калышат. Ал эми май айында бардык мектептер менен бала бакчалар иштеп, ысык сууга муктаждык көп болот", — деп билдирди Ибраимов.
Мэр бул маселе коомдук талкууга коюлгандан кийин гана чечилерин айтканы менен кийинки күнү өткөрүлгөн коллегияда ысык суу өчүрүү мөөнөтү июль айына жылдырылды.
