БИШКЕК, 19-май — Sputnik. Кыргызстанда улуттук басмакана ачылмайын документ жаатындагы коррупциялык ызы-чуу токтобойт. Бул тууралуу депутат Рыскелди Момбеков Жогорку Кеңештин ар кандай маселелери каралып жатканда билдирди.
Депутаттын айтымында, Кыргызстанда жарандарга төрөлгөндөн өлгөнгө чейин 350дөн ашык документ берилет.
"Паспорт Африканын Кениясында, улуттук валюта Францияда, негизи эле мамлекеттик маанидеги документтердин бардыгы чет өлкөдө басылып чыгат. Анда коррупциялык схема бар. Алардын тамырына суу куйган өкмөттүк мафия акча таап жатат", — деп билдирди депутат.
Момбеков документтердин өздүк баасы абдан эле арзан экенин белгиледи.
"Мисалы техпаспорттун өздүк баасы 20 эле сом турат. Бирок ал чет элде басылгандыктан баасы эки доллардан ашып кетип жатат", — деди депутат.
Эл өкүлү билдиргендей мамлекеттик маанидеги басмакана курулмайынча бул багыттагы коррупция токтобой турганын билдирди.
Ал эми Мамлекеттик каттоо кызматы паспорттор Кыргызстанда эле басылып чыгарын маалымдады.
