БИШКЕК, 18-май — Sputnik. Күз-кыш мезгилине карата Токтогул суу сактагычында былтыркыга караганда бир миллиард куб метрге көп суу топтоо пландаштырылып жатат. Бул тууралуу Sputnik Кыргызстан агенттигине "Электр станциялары" ишканасынын башкы директору Таалайбек Толубаев билдирди.
Кыргызстанда энергетикалык кубаттуулуктун жетишсиздиги байкалып келет, жаңы ишканаларды ишке киргизүү үчүн кошумча 385 мегаватт керектелет. Таңкыстыкты жоюу үчүн сууну сарамжалдуу пайдаланып, коңшу мамлекеттерден электр энергиясын импорттоо пландаштырылып жатат.
"Кыш жылуу болду, мындан улам былтыр топтолгон 13 миллиард куб метр суу жетти. Быйыл 14 миллиард чогултууга камынып жатабыз. Бул минималдуу чек", — деди Толубаев.
Анын айтымында, бул жылы суунун агып келиши орточо эсептин 94 пайызын түздү. Эгер адаттан тыш нерсе болуп кетпесе, пландаган көрсөткүчкө жетүү оор болбойт.
17-майга карата Токтогул суу сактагычындагы суунун көлөмү 9,9 миллиард куб метрди түздү. Былтыр ушул эле маалда 2,7 миллиардга аз болчу.
