БИШКЕК, 16-май — Sputnik. Алматы облусунун тургуну шаардагы азык-түлүк дүкөнүн тоноп, ага кошумча сатуучу аялды 48 ирет бычак менен саюуга шектелип кармалганын шаардык Ички иштер департаментинин маалымат кызматына таянып "Новости-Казакстан" агенттиги жазып чыкты.
Полициянын маалыматы боюнча, 24 жаштагы каракчы саат түшкү экиде дүкөнгө тоноо максаты менен кирген. Анын колунан 51 жаштагы сатуучу аял жабыр тарткан.
"Аял эс-учун жоготуп койгондон кийин аталган жаран кассаны текшерип, 9 миң теңге таап чыккан. Учурда жабырлануучу оор абалда шаардык ооруканалардын биринде. Дарыгерлер анын жашоосу үчүн күрөшүп жатышат", — деди Жети-Суу РИИБ башчысынын орун басары Даулет Самбетов.
Анын айтымында, кылмышты иликтөө үчүн түзүлгөн атайын топ дароо эле шектүү жарандын өздүгүн тактап, анын Алматы облусунун Иле районундагы айылдын тургуну экенин аныкташкан. Кармалган жаран убактылуу кармоочу жайга киргизилди.
Тергөө амалдарынын жүрүшүндө шектүү жаран аялды сайган бычакты кайда катканын көрсөтүп берген.
